Dielddanuori suohkan - Tjeldsund kommune lea okta dain 13 sámgiela hálddašanguovlluin Norggas, ja lea oarjeleamos sámegiela hálddašanguovlun Romssa ja Finnmárkku fylkkas.
Dielddanuori suohkan šattai mielde sámegiela hálddašanguvlui suoidnemánu 1.b. 2020. Ahte leat sámegiela hálddašanguovlun mielddisbuktá earret eará ahte dárogiella ja sámegiella leaba ovttaárvosaš gielat. Dát mielddisbuktá ahte suohkana ássiin lea riekti oažžut bálvalusaid sámegillii go váldet oktavuođa almmolaš ásahusaiguin, gč. Sámelága kapihttal 3 Sámegiella. Sámegiella galgá nu guhkás go vejolaš oidnot buot suohkana doaimmain, earret eará galget suohkana huksehusat galbejuvvot sihke sámegillii ja dárogillii. Suohkan lea maid Sámelága mielde geatnegahtton láhčit dili nu ahte suohkana bargit ožžot virgelobi oktan bálkkáin oahppan dihte sámegiela, ja dieđut ja almmuhusat galget leat dárogillii ja sámegillii.
Joksan dihte buot gáibádusaid, oažžu suohkan jahkásaččat guovttegielatdoarjaga Sámedikkis. Ovttasbargošiehtadus gaskal Dielddanuori suohkana ja Sámedikki mo geavahit guovttegielatdoarjaga dohkkehuvvui sámedikkeráđis borgemánu 30.b. 2022 ja Dielddanuori suohkanis áššis SST 15/22. Leat bargamin oažžut šiehtadusa vuollaičállot čavčča mielde.
Suohkan áigu bargat systemáhtalaččat deavdit suohkana geatnegatsvuođaid leat guovttegielat hálddašanguovlun.
