Šiehtadusa ulbmil lea láhčit dilálašvuođaid bistevaš ovttasbargui gaskal Sámedikki ja Dielddanuori suohkana Sámelága giellanjuolggadusaid hálddašeamis.

Dielddanuori suohkan galgá:

  • láhčit dilálašvuođaid nu ahte sápmelaččat galget sáhttit seailluhit ja ovdánahttit gielaset.
  • doahttalit álbmoga vuoigatvuođaid oažžut bálvalusaid sámegillii go váldet oktavuođa almmolaš ásahusaiguin

Ovttasbargošiehtadusa vuođđu lea Sámelága giellanjuolggadusat, mat galget sihkkarastit Dielddanuori suohkana álbmoga vuđolaš vuoigatvuođaid geavahit ja ovdánahttit sámegiela Dielddanuori suohkanis. Dát šiehtadus ii gáržžit ovddasvástádusa Sámelága giellanjuolggadusaid mielde, ja Sámelága njuolggadusat mannet dán šiehtadusa ovddabeallai.

 

Ovttasbargošiehtadus gaskal Dielddanuori suohkana ja Sámedikki mo geavahit guovttegielatdoarjaga dohkkehuvvui sámediggeráđis borgemánu 30.b. 2022 ja Dielddanuori suohkanis áššis SST 15/22.

 

Dieđut:

Dielddanuori suohkan šattai mielde sámegiela hálddašanguvlui suoidnemánu 1.b. 2020. Ahte leat sámegiela hálddašanguovlun mielddisbuktá earret eará ahte dárogiella ja sámegiella leaba ovttaárvosaš gielat. Dát mielddisbuktá ahte suohkana ássiin lea riekti oažžut bálvalusaid sámegillii go váldet oktavuođa almmolaš ásahusaiguin, gč. Sámelága kapihttal 3 Sámegiella. Sámegiella galgá nu guhkás go vejolaš oidnot buot suohkana doaimmain, earret eará galget suohkana huksehusat galbejuvvot sihke sámegillii ja dárogillii. Suohkan lea maid Sámelága mielde geatnegahtton láhčit dili nu ahte suohkana bargit ožžot virgelobi oktan bálkkáin oahppan dihte sámegiela, ja dieđut ja almmuhusat galget leat dárogillii ja sámegillii.

 

Joksan dihte buot gáibádusaid, oažžu suohkan jahkásaččat guovttegielatdoarjaga Sámedikkis.