Mii leat oaidnán dakkár cealkámušaid sosiala mediain ja áviissain ja gullan váidalemiid suohkanássiin ja muhtin suohkanpolitihkkáriin. Dát sáhka lea beaggán guhkit áigge ja lea čuvvon min dan rájes go šattaimet ođđa suohkanin.
Bargit eai dovdda daid diliid mat čuoččuhuvvojit, ja dál mii dáhttut bissehit dáid negatiivva historjjáid ja boastu dieđuid!
Muhtumin lea lossat bargat hálddahusas. Máŋgii leat min sivahallan das mii dáhpáhuvvá suohkanis, erenoamážit go lea sáhka rievdadit struktuvrraid ja unnidit bargosájiid. Bargit eai dovdda čuoččuhusaid ahte lea hearjos bargobiras, ahte eat beasa dadjat maid áigut ja ahte bargit leat aluin barggus ráđđehusviersus. Mis lea baicca buorre bargobiras, ja mii dorjot ja váldet vára guhtet guoibmámet go dakkár čuoččuhusat ain ilbmet. Mii eat sáhtet šat orrut jávohaga čuoččuhusaid dáfus, dadjá bargoveaga jođiheaddji Bente Solvalng hálddahusabargiid bealis.
Orru leamen boastu ipmárdus das mo suohkan doaibmá. Suohkan lea politihkkalaš mearriduvvon organisašuvdna man suohkanstivra hálddaša. Dat lea suohkanstivra mii mearrida. Dan ii daga hálddahus dahje ráđđeolmmái. Lea lihkká min bargu guorahallat vejolaš doaibmabijuid ja buktit evttohusaid min fágačehppodaga vuođul. Muhto dat lea loahpalaččat politihkkárat geat mearridit ja hálddahus galgá čuovvolit daid mearrádusaid. Hálddahus lea fágalaš ja ekonomalaš vuođul ovddidan dárbbuid seastit ruđa oažžun dihte suohkana ruhtadili buorránit. Hálddahus lea váldán badjelasas oasi seastimis ja mii leat rámis iežamet bargguiguin. Mii lea doaimmalaš mielbargit ja min resursageavaheapmi gierdá buohtastáhttot eará suohkaniiguin. Ii leat hálddahusa sivva ahte suohkan lea dan dilis go lea.
Suohkanbargit dihtet erohusa politihka ja hálddahusa gaskka. Ahte bargit eai ságas politihkkáriiguin ii leat danin ahte bargiid leat gieldán ovddidit oainnuset. Bargin mii čuovvut mearriduvvon bargonjuolggadusaid mas daddjo ahte dušše ráđđeolmmái, suohkanhoavddat ja dat gii fápmuduvvo dasa, sáhttá jietnadit maidege suohkana bealis. Jos oktage dovda balu, de lea danin go eat dieđe makkár boastu čuoččuhusat ja njuolggogielisvuođat min birra ilbmet nuppe have.
Mis lea positiiva sáhka muitalit!
Lea gieskat čađahuvvon anonyma bargobiraskárten ovttas bargovarrisvuođafuolahusain. Dát kárten čájeha čađamanni buori bohtosiid. Dát maid duođaštubvvo mielbargiid ságastallamiin. Bargovarrisvuođafuolahusa ráđđeaddi, gii čađahii kártema, dajai ahte son hárve lea oaidnán na positiivva bohtosiid sullásaš kártemiin eará fitnodagain. Kártenraporta lea ovdanbukton bargiide bargoveahkačoahkkimis vuossárgga.
Bargiid suodjalusáittardeaddji, Gunn Halvorsen, lea ilus go dát lea duođaštuvvon bargobiraskártemis. ja mii bargat systemahtalaččat bargiid bargobirrasiin.
Bargit dahket duođaid buori barggu. Mis lea čeahpes bargit geat áŋgirit barget suohkana ovddas, máŋggas ollu eanet go obage sáhttit vuordit. Mis leat maid bargit geat ledje álgán eará bargguide, muhto geat máhcce ruovttoluotta oanehis áiggi maŋŋil. Dan sii eai livčče dahkan jos min bargobiras lea nu heitot go čuoččuhuvvo, loahpaha bargoveaga jođiheaddji Bente Solvang.
