Dielddanuori suohkana ekonomalaš dilli lea hástaleaddji, ja dárbu gávdnat čovdosiid, mat sestet goluid dahje buktet eambbo sisaboađu, lea lassánan dađistaga go investerenfoanda lea unnon. Vai sihke suohkana jođiheaddjit, luohttámusolbmot ja politihkkárat galge oažžut seamma dieđuid ja oktasaš vuolggasaji ekonomiija duohta dili dáfus, ledje sii čoahkkanan oktasaš bušeahttaseminárii. Maŋŋil go ledje ožžon dieđuid ekonomalaš dili ja boahtteáiggi vejolašvuođaid birra, barge oasseváldit 7 joavkkuide, ja galge buktit oainnuid ja evttohusaid maid konkrehtalaččat sáhttá bargat buoridan dihte suohkana ekonomalaš dili.
Oasseváldit ledje áŋgirat, digáštallan bevddiid birra lei ealas ja bohte ovdan máŋga evttohusa. Oaivilat váldojit mielde ovdagotti viidáset bargui ekonomiija čuovvoleimiin ja 2023 bušeahta evttohusain.
