Ávžžuhuvvo ahte mánáidguvlui nissonolbmot ožžot fálaldaga boahkuhuvvot guokte dosa mRNA-vaksiinna, ja ahte boahkuheapmi čađahuvvo nuppi dahje goalmmát trimesteris (maŋŋil 13 vahku ja maŋŋil 26 vahku mánáidguvluiáigodagas). Mánáidguvlui nissonolbmuid, geat gullet dan riskajovkui mas covid-19 sáhttá ovdánit duođalaččat, sáhttet maid boahkuhuvvot vuosttaš trimesteris. Boahkuheapmi mánáidguvluiáigodagas suodjala maid máná maŋŋil go lea riegádan. Geahča ođastuvvon boahkuhanávžžuhusaid mánáidguvlui nissonolbmude fhi.no siiddus: Oppdatert vaksineanbefaling for gravide - FHI
Duogáš ávžžuhusaide lea ahte riikkaidgaskasaš dutkamušat čájehit ahte mánáidguvlui nissonolbmuin lea veaháš stuorat riska duođalaččat buohcat covid-19 dávddain buohtastahtton nissonolbmuiguin, geat eai leat mánáidguvlui, vaikko riskka lea unni ovttaskas nissonolbmuide. Riska oažžut duođalaš dávdda covid-19 geažil lassána mađi maŋŋileappot mánáidguvlui nissonolmmoš buohccá. Mánáidguvlui nissonolbmojoavku lea nu unni ahte eai geahčastuvvo váikkuhit njoammuma leavvamii dahje oažžut kontrolla pandemiijas. Muhto dattege lea dehálaš boahkuhit ovttaskas mánáidguvlui nissonolbmuid unnidan dihte riskka buohcat duođalaččat. Dán rádjái eai čájet boahkuhandieđut mánáidguvlui nissonolbmuin ahte boahkuheapmi váikkuha eatni dahje máná heajut guvlui mánáidguvluiáigodagas. Mánáidguvlui nissonolbmot eai oaččo eará váikkuhusaid go dan maid seamma áhkásaš nissonolbmot geat eai leat mánáidguvlui, dábálaččat vásihit. WHO ávžžuha vuoruhit mánáiguvlui nissonolbmuid koronaboahkuheami oktavuođas ja eanet riikkat fállet dahje ávžžuhit buot mánáidguvlui nissonolbmuid boahkuhit iežaset.
Bohkuheapmi covid-19 vuostá mánáidguvluiáigodagas dagaha ahte eatni antiávdnasat gorudis sirdašuvvet mánnái - erenoamážit mánáidguvluiáigodaga maŋit áigodagas. Boahkuheapmi covid-19 vuostá mánáidguvluiáigodagas váikkuha danin dasa ahte mánná lea suodjaluvvon virusa vuostá maŋŋil go lea riegádan, ja dainna lágiin suddjejuvvo sihke eadni ja mánná dávdda vuostá.
Ávžžuhuvvo boahkuhit mánáidguvlui nissonolbmuid mánáidguvluiáigodagas. Mánáguvlui nissonolbmot geat lea dušše oktii boahkuhuvvon ovdal riegádahttima, berrejit oažžut fálaldaga nuppi boahkuheapmái go leat mánáoažžunáiggis (riegádahttima rájes ja sullii 6 vahku maŋŋil) nu ahte boahkuhuvvojit dievaslaččat ávžžuhuvvon boahkuhaninterválla mielde, dahje dalle go praktihkalaččat lea vejolaš. Sáhttá boahkuhit njamaheaddji nissonolbmuid. Nissonolbmot geat ovdalaččas dahje mánáidguvluiáigodagas leat buohcan covid-19 dávddas, sáhttet oažžut fálaldaga boahkuheapmái seamma ládje go álbmot muđuige. Sáhttá maid boahkuhit nissonolbmuid geat plánejit oažžut máná ja sidjiide geat mannet IVF-čielggadeapmái ja -dikšui.
Ráhkkananprinsihpa mielde eai ávžžut boahkuhit mánáidguvlui nissonolbmuid álggugeahčen mánáguvluiáigodagas. Mánáguvlui nissonolbmot, geat gullet koronadávdda riskajoavkkuide, sáhttet áŋke boahkuhuvvot vuosttaš trimesteris daningo sis, geain lea vuollásaš dávddat, lea maid stuorat riska oažžut duođalaš dávddaid vuosttaš trimesteris.
Dieđit iežat Helseboka bokte dahje váldde oktavuođa boahkuhantelefovnnain, árgabeivviid dii 09.-11, telefonnummir 94796421, oažžun dihte boahkuhanáiggi.
